تدوينة بيضة، مستحبة، في وقتها، تنفع وما تضرش، اما حبيت، وقت ما ظهر عندي شوية وقت، عاد حبيت نحكي ونقترح حل جذري للمعضلة متاع الخونة والاستقواء بالاجنبي، لانو المشكلة موجودة و زايد باش الواحد يعمل روحو موش هوني، النشر في وسائل اعلام اجنبية مهما كانت صديقة و الا شقيقية و الا رقيقة و الا ان شالله حتى تصفيقة، كلو استقواء بالاجنبي، ولذلك، انا رايي ومن غدوة انا بش نتصرف بطريقة اخرى وكل ما نلقى الوقت ونخنتب كلمتين بش نبعثهم لقناة تونس سبعة، يقول القايل علاش تونس سبعة؟ على خاطر لا مزية لعربي، نقصد لا مزية لغربي مستعمر، تونس سبعة تتمول من التوانسة من تسكرة الضو، يعني متاعنا، استقواء بالمحلي الوطني ذوق اربعة وعشرين يا بو ربّ! و الي من بعد هذا ينشر ويحكي ويقطع ويريش في وسايل اعلام اجنبية معناها ناوي على العيب... تونس سبعة بيتك الاعلامي، و الي في يدو حجرة يلوحها... المدونين زادا من المفروض ينشرو التدوينات متاعهم على تونس سبعة، فيها بلاصة، التلفزة الوطنية ما هاش تنشر في الحكم و الدرر كل دقيقة، فيها برشة بعرور و برشة زبلة وبرشة معيز، معناها في التلفزة هذه تلقى بلاصة لبعض النصوص متاع الصحفيين الي ينشرو و العياذ بالله البرّة الي يقلك، وبعض النصوص متاع المدونين. انا خليولي خمسة دقايق كل صباح من السبعة الى السبعة و درج، وهذا جدول وقتي بالطبيعة ويمكن تعديلو والاتفاق عليه... المهم نقطعو الدابر متاع الاستقواء بالاجنبي، على خاطر يا جماعة اذا كان النشر في وسايل اعلام اجنبية يتسمى استقواء بالاجنبي، راهو جوجل الي فيه المدونات الكل و فايس جار داربوك، والمؤسسات العمومية من اصغرها لاكبرها، لمن اصغر الى اعلى نقطة في الهرم، الي عندها موقع على الانترنات، راهي المواقع هذكة موجودة على عنكبوت اجنبي في نهاية الامر، زادا هو اجنبي!!!، وغيرهم، والكل، والاخرين، والباهيين والي موش ليك الكل، الكلهم وسايل اعلام اجنبية، و اذا بالتدقيق : بيوت اجنبية، لذلك، تونس سبعة للناس الكل، من غدوة نقطعو الدابر متاع الاستقواء بالاجنبي، نصوصكم و فيديواتكم وملاحظاتكم وتعليقاتكم وصابونا التونسي الكل في تونس سبعة، الببت التونسي للجميع